Um kerfiskennitölur
Um kerfiskennitölur
Tilgangur kerfiskennitölu (kennitölu á utangarðsskrá)
Almennt viðmið um útgáfu kerfiskennitölu á utangarðsskrá er að þörf er á einkvæmu auðkenni gagnvart hinu opinbera t.a.m. þegar nauðsynlegt er að geta aðgreint einstaklinga enn fremur svo unnt sé að skiptast á upplýsingum um einstaklinginn við aðrar stofnanir eða fyrirtæki, eins ef lög, reglur eða reglugerðir kveða á um nauðsyn kennitölu.
Hver getur sótt um skráningu á utangarðsskrá og í hvaða tilgangi
Einungis opinberir aðilar geta sótt um kennitölu fyrir erlenda ríkisborgara. Umsóknir þurfa að berast rafrænt og með rafrænni auðkenningu. Með umsókninni staðfestir opinberi aðilinn að hann sækir um kennitöluna vegna sérstakar nauðsynjar sbr. ofangreint viðmið og til eigin notkunar.
Athugið að skráning á utangarðsskrá er eingöngu fyrir einstaklinga sem dvelja skemur en 3-6 mánuði á Íslandi eða hafa enga viðdvöl hér á landi. Skráningin veitir engin réttindi á Íslandi. Ef erlendur ríkisborgari hyggst dvelja lengur en 3-6 mánuði á Íslandi og njóta réttinda hér á landi þá gildir eftirfarandi: EES/EFTA ríkisborgarar sem ætla að dvelja umfram þrjá mánuði nota eyðublað A-270 (íslenska) eða A-271 (enska). Norðurlandabúar sem ætla að dvelja umfram sex mánuði nota eyðublað A-257 eða A-258. Aðrir sækja skráningu til Útlendingastofnunar.
Umsóknarferli
Sótt er um skráningu á utangarðsskrá og þar með útgáfu á kerfiskennitölu rafrænt á vef Þjóðskrár Íslands.
Athugið að afrit af vegabréfi eða löggiltu ferðaskilríki þess sem sótt er um kennitölu fyrir þarf að fylgja með umsókninni og vera í gildi á þeim tíma sem sótt er um.
Til þess að sækja um rafrænt þá þarf opinberi aðilinn að auðkenna sig á eftirfarandi hátt:
- Íslykill/rafræn skilríki á kennitölu opinbera aðilans.
- Íslykill/rafræn skilríki starfsmanns sem opinber aðili hefur veitt umboð til þess að sækja um kerfiskennitölu fyrir hönd þess. Til þess að veita starfsmanni umboð þá þarf að nota Íslykil/rafræn skilríki fyrirtækisins til þess að skrá sig inn á mínar síður á Ísland.is og skrá umboð á tiltekinn starfsmann. Leiðbeiningar vegna veitingu umboðs eru hér.
Um utangarðsskrá
Utangarðsskrá var tekin í notkun árið 1987 og gaf þáverandi forstjóri Hagstofu út reglur um skráningu og notkun kennitalna vegna þarfa hins opinbera. Tilgangur utangarðsskráningar var að tryggja opinberum aðilum einkvæmt númer til þess auðkenna einstaklinga sem ekki voru skráðir á þjóðskrá (einstaklingsskrá) og umsóknaraðilar opinberir aðilar sem sóttu um á þeim eyðublöðum sem (þá) Hagstofan lét í té. Tilgangur utangarðs kennitölunnar er enn hinn sami og umsóknarferlið óbreytt.
Með lögum um skráningu einstaklinga nr. 140/2019 var kerfiskennitalan og umsóknarferlið vegna hennar lögfest í fyrsta skipti. Með þessum lögum varð sú breyting að einungis opinberir aðilar sem þurfa á kennitölu að halda starfsemi sinnar geta sótt um kerfiskennitölu fyrir erlenda ríkisborgara. Eins segir í fyrrnefndum lögum að kerfiskennitölur skulu aðgreindar með sýnilegum hætti frá kennitölum einstaklinga í þjóðskrá.