Sótt um vegabréf

Vegabréf

  • Afgreiðslutími

    Afgreiðslutími vegabréfa er allt að 2 virkir dagar frá umsóknardegi.

    Ath. Ef frídagar eru á tímabilinu þá lengist tíminn sem þeim nemur.

    Hraðafgreiðslur vegabréfa taka 1 virkan dag frá umsóknardegi. 

    Afhending

    Hægt er að fá vegabréf afhent á þrjá vegu:

    • Sótt í afgreiðslu ÞÍ: Borgartúni 21, 105 Reykjavík
    • Sótt á umsóknarstað
    • Sent í pósti

    Nafn viðtakanda verður að vera skráð á lúgu/póstkassa.

    Athugið að vegabréf eru framleidd hjá Þjóðskrá Íslands og því þarf að gera ráð fyrir tíma fyrir póstburð ef senda á vegabréf til umsækjanda eða ef umsækjandi vill sækja vegabréf á umsóknarstað. Vegabréf eru send með Íslandspósti. Sjá nánar á heimasíðu Íslandspósts.

    Ef umsækjandi getur ekki sótt vegabréf sjálfur á afhendingarstað getur hann veitt öðrum umboð. Forsjáraðili verður að sækja vegabréf barns sjálfur nema hann veiti öðrum umboð til þess. 

  • Umsóknarstaðir vegabréfa innanlands

    Umsækjendur vegabréfa þurfa að mæta í eigin persónu á umsóknarstað.

    Athugið að á sumrin getur verið mikið álag á umsóknarstöðum.

    Það sem umsækjandi þarf að hafa með sér:

    • Eldra vegabréf. Sérstakar reglur ef vegabréf hefur glatast.
    • Persónuskilríki með mynd, ökuskírteini eða nafnskírteini, ef eldra vegabréf er glatað.
    • Greiðslu fyrir vegabréfið. Gjaldskrá vegabréfa. Ekki er hægt að greiða með kreditkorti hjá sýslumannsembættum.
    • Komist annar forsjáraðili barns undir 18 ára ekki með á umsóknarstað skal hann fylla út eyðublað V-901.
      Sjá vegabréf fyrir börn hér fyrir neðan..
    • Samþykki lögráðamanns þegar það á við.

    Ef umsækjandi getur ekki með fullnægjandi hætti sannað á sér deili, er heimilt að gefa honum kost á að kveða til tvo lögráða einstaklinga, sem geta gert grein fyrir sér á fullnægjandi hátt og skulu þeir mæta með á umsóknarstað og votta og staðfesta með undirskrift sinni að umsækjandi sé sá sem hann segist vera. Athugið að vottar verða að vera með löggild skilríki með mynd. 

  • Útgáfa skilríkja erlendis á vef utanríkisráðuneytis

    Umsækjendur vegabréfa þurfa að mæta í eigin persónu á umsóknarstað.

    Hafa þarf samband við sendiráð og ræðismenn til að bóka tíma.

    Það sem umsækjandi þarf að hafa með sér:

    • Eldra vegabréf. 
    • Persónuskilríki með mynd, ökuskírteini eða nafnskírteini, ef eldra vegabréf er glatað.
    • Greiðslu fyrir vegabréfið. Gjaldskrá vegabréfa.
    • Komist annar forsjáraðili barns undir 18 ára ekki með á umsóknarstað skal hann fylla út eyðublað V-901. Sjá vegabréf fyrir börn hér fyrir neðan.
    • Samþykki lögráðamanns þegar það á við.

    Ef umsækjandi getur ekki með fullnægjandi hætti sannað á sér deili, er heimilt að gefa honum kost á að kveða til tvo lögráða einstaklinga, sem geta gert grein fyrir sér á fullnægjandi hátt og skulu þeir mæta með á umsóknarstað og votta og staðfesta með undirskrift sinni að umsækjandi sé sá sem hann segist vera. Athugið að vottar verða að vera með löggild skilríki með mynd. 

  • Börn þurfa alltaf að koma með á umsóknarstað þar sem ljósmynd er tekin á staðnum.

    Forsjáraðilar þurfa að mæta ásamt barni þegar sótt er um vegabréf. Komist annar forsjáraðili ekki á umsóknarstað þarf hann að fylla út eyðublað V-901 í viðurvist tveggja votta sem einnig rita nafn sitt á skjalið. Hinn forsjáraðilinn tekur það með sér á umsóknarstað. Mæti báðir forsjáraðilar á umsóknarstað er eyðublað V-901 fyllt út þar. Athugið að forsjá barns er ávallt könnuð hjá Þjóðskrá Íslands áður en vegabréf er útgefið. Haft verður samband við forsjáraðila ef gögn vantar. 

    Forsjáraðilar geta veitt 3ja aðila umboð til að sækja um vegabréf fyrir þeirra hönd. Þá skal fylla út eyðublað V-901 ásamt fylgiskjali við V-901.

    Fari forsjáraðili einn með forsjá barns er undirskrift hans nægjanleg vegna umsóknar og staðfestir Þjóðskrá Íslands að viðkomandi fari einn með forsjá.

    Sérstök athygli er vakin á að hafi forsjáraðili gengið í hjúskap fyrir 1.1.2013 þarf einnig samþykki stjúpforeldris. Hafi forsjármaður skráð sig í sambúð í þjóðskrá fyrir 1.1.2012 þarf einnig samþykki sambúðarforeldris.

    Ef forsjá barna er skráð hjá Þjóðskrá Íslands geta foreldrar séð hvernig henni er háttað á mínum síðum á Ísland.is undir „Þjóðskrá – Fjölskyldan mín“. 

    Upplýsingar um forsjárskráningu barna

    Ath. í sumum tilfellum þarf að kalla eftir forsjárgögnum frá útlöndum ef börn eru eða hafa verið búsett erlendis áður en hægt er að gefa út vegabréf.

  • Í sérstökum tilvikum er Þjóðskrá Íslands heimilt að gefa út fleiri en eitt vegabréf fyrir sama einstakling. Aukavegabréf verður þó ekki gefið út nema umsækjandi sýni fram á brýna þörf fyrir fleiri en eitt vegabréf, t.d. vegna tíðra vinnuferða til landa sem krefjast vegabréfsáritana. 

    Ferlið:
    Vinnuveitandi útbýr formlega beiðni um aukavegabréf fyrir viðkomandi starfsmann. Beiðnin þarf að vera á bréfsefni fyrirtækisins, undirrituð og dagsett. Þar þarf að gera grein fyrir og rökstyðja hvers vegna starfsmaður þarf á tveimur vegabréfum að halda. 

    • Vinnuveitandi sendir beiðnina sem skannað skjal í tölvupósti til vegabréfadeildar Þjóðskrár Íslands, vegabref@skra.is. 
    • Þegar beiðnin hefur verið afgreidd er svar sent á vinnuveitanda eða það netfang sem beiðnin kemur frá.
    • Starfsmaður/einstaklingur fer á umsóknarstað og greiðir fyrir nýja umsókn (myndataka og fleira). 
    • Vegabréf framleitt.

    Beiðnir um aukavegabréf sem ekki tengjast starfi fara í sama ferli en rökstuðningur, undirritaður og dagsettur, skal þá koma á bréfi frá einstaklingnum sjálfum.“

    ATH: Samþykki fyrir útgáfu aukavegabréfs má ekki vera eldri en 3 mánaða. Fyrir hvert nýtt vegabréf þarf að koma inn ný beiðni frá vinnuveitanda.

     
  • Gildistími vegabréfa er tíu ár frá umsóknardegi, en fimm ár fyrir börn yngri en 18 ára.

    Ef eldra vegabréf er týnt/stolið skal nýtt vegabréf hafa sama gildistíma og fyrra vegabréf sem tilkynnt er glatað samkvæmt 2. mgr. 6. gr. laga um vegabréf. 

    Með heimild í 18. gr. reglugerðar um íslensk vegabréf, mega þeir sem tvisvar sinnum eða oftar hafa glatað vegabréfum sínum eiga von á að vegabréfum þeirra verði ákvarðaður 2ja ára eða skemmri gildistími á meðan hin glötuðu vegabréf eru í gildi

    Kröfur erlendra stjórnvalda

    Athugið að Þjóðskrá hefur ekki upplýsingar um hvaða kröfur eru gerðar um gildistíma vegabréfa í hverju ríki fyrir sig. 

    Almenna reglan er:

    Þeir sem hyggjast ferðast utan EES verða að hafa vegabréf sem gilda í a.m.k. 6 mánuði frá áætluðum ferðalokum.

    Rétt er að kynna sér hvaða kröfur eru gerðar í þeim ríkjum sem heimsækja á.

    Upplýsingar um vegabréfsáritanir má finna á vef utanríkisráðuneytis

  • Neyðarvegabréf eru gefin út til að aðstoða íslenska ríkisborgara í neyð, helst til að komast heim eða á næstu umsóknarstöð vegabréfa. Neyðarvegabréf gildir aldrei lengur en 12 mánuði.

    Neyðarvegabréf eru talin fullgild ferðaskilríki í Evrópu en þau eru ekki tölvulesanleg og því er ekki mælt með að þau séu notuð til ferðalaga utan Evrópu.

    Útgáfa skilríkja erlendis á vef utanríkisráðuneytis

Athugið

01

Sækja á um vegabréf   hjá sýslumannsembættum

02

Ekki hægt að borga með kreditkorti  hjá sýslumannsembættum

03

Það tekur allt að 2 virka daga  að afgreiða vegabréf. 1 virkan dag í hraðafgreiðslu.