Þjóðskrá hefur endurbætt upplýsingagjöf um kaupendur íbúða á fasteignamarkaði. Finna má talnaefni um kaupendur í Fasteignagátt Þjóðskrár. Nýja birtingin sýnir meðal annars meðalaldur fasteignakaupenda, fjölda kaupenda, meðalstærð íbúðarhúsnæðis og meðalverð í viðskiptum fyrir fasteignakaupendur eftir ársfjórðungum og árum. Birtingin byggir á skráningu þinglýstra kaupsamninga hjá Þjóðskrá og eru kaupendur skilgreindir sem þeir einstaklingar sem eru skráðir sem kaupendur í þinglýstum kaupsamningi.
Gögn um kaupendur uppfærast sjálfvirkt eftir því sem nýjar upplýsingar eru skráðar.
Hér má sjá samantekt af því sem meðal annars má lesa út úr gögnunum um kaupendur:
- Á fjórða ársfjórðungi voru 4544 kaupendur og meðalaldur þeirra 41,2 ár. Meðalstærð íbúða í viðskiptum var 126,4 fermetrar og meðalkaupverð 61 milljón króna.
- Hæsta meðalkaupverðið var á höfuðborgarsvæðinu þar sem það var um 70,7 milljónir króna en lægst á Vestfjörðum þar sem meðalkaupverð var 25,4 milljónir króna.
- Hæsti meðalaldur íbúðakaupenda var á Suðurlandi. 42,9 ár en lægsti meðalaldur á Suðurnesjum eða 37,4 ár.
- Íbúðareignir í viðskiptum voru stærstar að meðaltali á Norðurlandi vestra eða um 164,6 fermetrar en minnstar á Norðurlandi eystra þar sem eignir voru um 116,9 fermetrar að meðaltali á fjórða ársfjórðungi.